澳門勵駿（０１６８０）

《魚缸博客》今日（２３日）啲博彩股繼續升，銀娛（０００２７）、金沙（０１９２８）
密密收復番失地。反而澳門勵駿（０１６８０）就突然宣布主席周錦輝押股，一押就押咗１２巴
仙股份，若以噚日（２２日）收市價計，呢批股份市值都有４４億幾，咁大銀碼，勵駿上半場都
一度潛左最多近３巴仙。
　　勵駿由舊年７月上市都依家都未夠一年，已經唔係第一次抽水同押股架喇。今年初已經抽咗
近１４億銀，之後又向銀行融資４０億銀，又押股畀瑞信等，總之就係「ｃａｐ水」停不了。雖
然今次大老細押股就無講到借嚟做乜，不過估計都係為咗漁人碼頭重建項目啦。
　　講真個漁人碼頭都唔知重建到幾時先完工，而且首批賭桌仲要等政府批准，賺唔賺到錢好似
霧裏看花咁，家陣一開波就已經要洗咁多億，又抽過咁多次水，睇嚟缸友都係觀望下算喇。
　　雖然勵駿下半場竟然拗腰上番嚟，不過博客都係鍾情番銀娛同金沙，話晒佢地之前跌咁多，
依家順勢買返少少博反彈仲好！