跟誠哥搵食，看準以色列新科技（一）

【數位風潮】跟誠哥搵食，看準以色列新科技（一）

　　《數位風潮》寫咗兩期手機，今次想跳出去，跟下超人誠哥搵食。股民除咗關心長和系業績
，誠哥私人投資基金Ｈｏｒｉｚｏｎ　Ｖｅｎｔｕｒｅｓ，戰績彪炳，特別鍾情投資以色到初創
企業。近期基金仲係大陸「曬冷」，聯同國務院發展研究中心合辦「２０１４科技創新日」，展
示投資成果。

　　之前出去做野，見到光大控股（００１６５）首席執行官陳爽，問佢光大成立基金投資於以
色列，目標出資總額為２億美元，有冇跟誠哥風？佢話個基金預備咗兩年，大家英雄所見略同，
因為內地經濟轉營，要攪環保、改善農業，佢仲話大家投資的領域不同，光大針對成熟企業，不
是針對Ｓｔａｒｔ－Ｕｐ公司。想投資高增值野，要捉到路，不外乎日常生活層面，仲有國防工
業及環保，前者你冇佢唔得，後者政府冇佢唔得。

　　摺男有幸去過兩次以色列，對呢個地方情有獨鍾。以色列雖然係一個科技出口國，但你去到
市面，其實好多人都仲係用緊Ｎｏｋｉａ的２Ｇ電話，ｉＰｈｏｎｅ同Ｇａｌａｘｙ雖然都有，
其實冇你想象中咁多，佢地科技幾勁都好，冇你諗到星球大戰咁科幻。但咁點解以色列會成功？

　　呢個真係「逼」出個未來，雖然成個阿拉伯國家世界，除咗約旦、埃及近年係有朋友做之外
，其他阿拉伯國家同猶太人都冇官方交流，近數十年關係叫做好咗，以色列都仲可以暗中同阿拉
伯人做生意，以前最惡劣的時間，係咩都俾人禁運，就算係汽車，都係得美國嘢、歐洲貨，日本
牌子怕得罪油佬，出口少之又少。

　　講到資源，以色列北方叫做有水源同地，可以種下嘢食，不過唔好唔記得，北方仇家有敘利
亞，未打１９６７戰爭前，北方戈蘭高地仲係敘利亞手上，人地成個炮台對住你，其實土地都冇
幾多。南邊係沙漠直到紅海，要乜冇乜。由以色利１９４８年立國，流散海外猶太人回歸，即時
要處理食物水源等問題，不過立國之後，歐洲有好多學識的猶太移民帶來技術，加上民族性夠勁
，死唔認輸，相信科技改變一切。以色列總統佩雷斯曾講過「農業，９５％是科技，５％是勞力
。」加上外面阿拉伯禁運，可以出口入口東西都好貴，所以形成以國一定要出口賺到錢，又易運
出運入既科技野。

　　講到猶太人科技好巴閉，不少人想知點入場投資，而家先賣個關子，下期再講軍工業，無人
飛機同相關股份，其中有間叫做「Ｅｌｂｉｔ」公司，係Ｎａｓｄａｑ上市，呢間野堅勁，巴西
世界盃場地上空的保安都用佢無人機。